Hmong Baptist National Association

February 19, 2024

—

by

HBNA Editor
in

February 19, 2024
Nubnuav Nyeem-Kawm Vaajtswv Txujlug

 

Nqailug Rua Nubnua

“Mej pum, tug  TSWV kws yog peb tug Vaajtswv, hab yog peb cov yawmkoob tug Vaajtswv yuav muab rua peb ua peb tug. Mej ca le saib saib lub tebchaws nuav hab moog txeeb nyob lawv le Vaajtswv has rua mej. Mej tsi xob ntshai, hab tsis xob poobsab.” — Kevcai Deuteronomy 1:21

Xaav Txug Tejlug Rua Nubnua

Lu lug txhawbzug kws tsi qaugzug yog tej kws pib tau txujkev tshab, txhwjxeeb yog taug kev txawm yog nyuaj los yuav moog txug lub tebchaws kws Vaajtswv coglug tseg rua puab. Tomqaab ua qhev plaub puas tawm xyoo, cov tuabneeg tau quaj nrhav Vaajtswv hab thov Vaajtswv coj puab nrug Mauxes moog rua lub tebchaws kws Vaajtswv cog lug tseg. Lub sijhawm kws puab taug kev lug moog mas puab tau pum Vaajtswv lub fwjchim cawm puab ntau yaam kws yog kaum yaam Vaajtswv ua rua Falauj pum, thaus puab hlaa Dlej Havtxwv Lab hab Vaajtswv muab Kevcai rua puab coj sau roob Xinais.  Mauxes twv puab hab txhawb puab lub zug tas, kuas tsi xob tso Vaajtswv tseg sub Vaajtswv txhaj nrug puab nyob hab coj puab moog txug lub tebchaws kws Vaajtswv coglug tseg yuav muab rua puab ua puab tug.  Kuv cov phoojywg, peb tsi xob ywg nyob rua peb tam nuav vim lub nplajteb peb nyob nuav yuav puamtsuaj hab plujmoog. Nwg yog lub sijhawm peb yuav coj hab ua lawv le Vaajtswv txujlug hab kuas peb tsi xob ntshais hab txhawj yaam le cov tuabneeg tsi paub Vaajswv, peb yog hu lug ua Vaajtswv lub teebci huv qhov raus rua nplajteb pum. (Mthais Matthew 5:14-16; Filipians Philippians 2:14). Kuas peb lug saib tas, tej nuav nwg zoo rua peb hab rua Vaajtswv.

Kev Thov Vaajtswv

Thaus kuv tseem taabtom lomleeg hab luj hlub huv kev ntseeg, O, Vaajtswv thov ceebtoom kuas kuv ncu txug koj tej lug cogtseg, tsi xob pub kuv muaj kev ntshai thaus kuv nyob nrug koj, thov txhawb kuv lub zug hab muaj koj tug ntsujplig nrug nraim kuv hab coj kuv kuas kuv ruaj sab tau rua koj tej lug cogtseg. Kuv yuav muaj yeej yog koj pub kuv muaj yeej hab coj kuv kuas ua rua koj tau koobmeej hab fwm koj. O, Txiv, kuv xaav tau muaj lub neej nyob nrug koj moog taag kuv tam neej! Huv tuav lub npe kuv tug Tswv Yexus Khetos, Kuv thov. Amees.