|
|
HOME |
Peb pawg ntseeg First Hmong Baptist Church, pib xyoo 1980 nyob rau lub nroog Pittsburgh Pennsilvania. Xibhwb Tooj Zoo Vaj yog tus coj peb pib txij thaum pib los txog rau xyoo 2000.
Lub nroog Pittsburgh yog ib lub nroog loj thiab muaj koob, tiamsis tsuas muaj peb tsoom Hmoob 18 yim tuaj nyobxwb. Txog xyoo 1984, peb coj tau 14 yig los ntseeg Vajtswv lawm. Vim peb tsoom Hmoob nyob rau hauv nroog no tsis coob pis tsawg. Xyoo 1995, Vajtswv thiaj qhib peb lub siab kom nrhiav kev tawm mus nyob rau lub nroog uas muaj Hmoob coob. Thaum ntawd peb tag nrho 14 yig cia li txiav tsim siab tsiv los mus nyob rau Minnesota hauv 2 lub nroog ntxaib St.Paul/Minneapolis.
Peb yog pawg ntseeg uas ua neeg thojnam txaus nkaus. Thaum 5 lub xyoos uas peb nyob rau Pittsburgh, peb twb mus qiv nto 3 lub tuam tsev pehawm Vajtswv lawm ( xyuas duab 1,2,3 saum sab laug). Thaum peb tsiv los mus poob rau hauv 2 lub nroog ntxaib tau 15 lub xyoos, peb kuj mus qiv tuamtsev pehawm Vajtswv nto 5 lub thiab (xyuas duab 4,5,6,7,8 sab xis). Lub 6 (#9) mam li yog lub peb nqis peev yuav tau los ua peb tug.
Peb yog pawg ntseeg uas sib tso tsis tau tseg. Nco tau thaum xyoo 1994, peb ib txhia tseem nyob rau Pittsburgh es ib txhia xub los xyuas tebchaws ua ntej rau Minnesota, peb sib nco kawg nkaus li. Tseem nco tau thaum peb sawvdaws tsiv los mus rau Minnesota, pawg ntseeg Pittsburgh Baptist Church uas yog peb lub niam Church cia li ntiav ib lub tsheb thauj tag nrho peb txhua yim tej qhov txhia chaw nrog peb los yog peb tsis tau nqis peev li.
Thaum peb xub los poob rau hauv 2 lub nroog Ntxaib, Vajtswv hlub peb kawg li, peb sawvdaws puav leej tau dej num zoo txhua tus. Dhau ntawd Vajtswv kuj foom koobhmoov pub rau peb muaj kev loj hlob thiab coob zujzus. Xyoo 1993 peb tsa muaj ib pawg ntseeg tshiab hu ua East St.Paul Hmong Baptist Church thiab xibhwb Tswv Liaj Vaj yog tus coj pawg ntseeg no mus rau qhov loj hlob zoo.
Cov duab nov yog cov yim neeg uas tau tuaj ua tswv cuab rau hauv pawg ntseeg txij thaum peb tseem nyob rau Pittsburgh los txog rau xyoo 2001. Feem coob yog cov nimno tseem nyob hauv pawg ntseeg no, ib feem yog cov mus pib pawg ntseeg tshiab, tej yim ho mus koom lwm pawg ntseeg lawm, thiab tej tso kev ntseeg tseg lawm los muaj. Tsis tag li ntawd tseem tshuav ntau yim uas peb khaws tsis tau lawv cov duab cia losmuaj.
Nco tau thaum xyoo 1987, peb tseem qiv pawg ntseeg Calvary Baptist Church lub tuamtsev pehawm Vajtswv. Muaj ib zaug lawv cia li kaw qhov rooj thiab tsis pub peb mus pehawm Vajtswv hauv lawv lub tuamtsev lawm. Zaum ntawd kuj ua rau peb cov thawj coj nyuab siab qho mentsis. Tiamsis kuj yog qhov zoo vim txij hnub ntawd los peb thiaj li xeevxwm thiab paub xav txog lub tuamtsev uas yog peb tug. Peb pib thov Vajtswv los tau ntau xyoo, tiamsis tseem tsis tau txog caij Vajtswv pomzoo rau peb muaj peb lub tuamtsev. Nco ntau thaum ntawd xibhwb Tooj Zoo teeb tau ib daim duab txog lub tuamtsev uas yog peb tug zoo nkaus li lub nimno peb yuav tau no ntag.
Xyoo 1997, peb pawg ntseeg thiaj li los teeb homphiaj thiab thov Vajtswv uake tias tsis pub komdhau xyoo 2000 peb yuav tsum tau peb lub tuamtsev. Vajtswv tau teb peb tej lus thov, yog li thaum xyoo 2000 lub caij Christmas, peb pawg ntseeg thiaj li yuav tau lub tuamtsev uas yog peb tug.
Peb pawg ntseeg tau cog lus uake tias peb yuav yog ib tse neeg ntawm Vajtswv lub xub ntiag. Peb yuav sibpab thiab sib txhawb zog. Peb tau hais ntxiv tias thaum peb muaj kev txhawj xeeb ib yam dabtsi twg rau ib yim twg nyob hauv peb pawg ntseeg. Yog yim ntawb tsis vam txog peb los tsis ua li cas. Tiamsis yog nws vam khom txog peb, peb yuav tsis tso nws tseg.
Peb qhib qhov rooj lug rau ib tsoom kwvtij neejtsa hauv lub nroog ntxaib tuaj nrog peb koom kev pehawm tau txhua lub caij
nyoog. |